धनगढी । बाजुराको बुढीगंगा नगरपालिका–५ स्थित भानोदय माध्यमिक विद्यालयकी गणित शिक्षिका २७ वर्षीया जानकी खड्काले विवाहको दबाब सहन नसकी आत्महत्या गरेकी छिन् ।
डोटीको पूर्वीचौकी गाउँपालिका–१ घर भएकी र हाल कैलाली बहुमुखी क्याम्पसमा स्नातकोत्तर अध्ययनरत जानकीले मृत्यु अघि लेखेको सुसाइड नोटमा आफ्ना बुबा र भाइलाई सम्बोधन गर्दै लेखेकी छिन्- “आदरणीय ड्याडी, सरी, म हजुरको सपना पूरा गर्न सकिनँ । मैले दबाब झेल्न नसकेरै यो बाटो रोजेकी हुँ।”
पत्रअनुसार, शिक्षा अधिकृत गणेशबहादुर रावलले सामाजिक सञ्जाल फेसबुकमार्फत जानकीसँग परिचय बढाएका थिए र विवाहका लागि लगातार दबाब दिँदै मानसिक तनाव सिर्जना गरेका थिए । विवाहको प्रस्ताव अस्वीकार गरेपछि रावलले जानकीका भाइलाई फोन गरी ‘तिम्रो दिदीले मसँग विवाह नगरे मारिदिन्छु’ भन्दै धम्की दिएको पत्रमा उल्लेख छ ।
जानकीले लेखेकी छन्- “न मैले उसलाई भेटेकी छु, न देखेकी छु । सबै उसका नाटक हुन्, मलाई फसाउने । बाबाआमाको इज्जत गुमाएर, तिमीहरूलाई नराम्रो संस्कार सिकाएर कसैको श्रीमान् र बुवा भइसकेको मान्छेसँग म जीवन जिउन सक्दिनँ।”
नेपाल सरकारको अधिकृत बन्ने सपना बोकेकी जानकीले कार्तिक १० गते घरदेखि करिब ७ सय मिटर टाढा खोला किनारको रुखमा झुण्डिएर जीवन अन्त्य गरेकी थिइन् ।
घटनापछि उनका बुबा चक्रबहादुर खड्काले शिक्षा अधिकृत रावलविरुद्ध आत्महत्या दुरुत्साहनको जाहेरी दिएका छन् । जिल्ला प्रहरी कार्यालय डोटीले कार्तिक ११ गते रावललाई पक्राउ गरी म्याद थप अनुमति लिएर अनुसन्धान अगाडि बढाइरहेको जनाएको छ ।
जानकीको असामयिक निधनले परिवार, साथीभाइ र शैक्षिक क्षेत्र स्तब्ध बनेको छ । साथीहरूले असल, मेधावी र सपनाले भरिएकी साथी गुमाएको भन्दै दोषीलाई कडा कारबाहीको माग गरेका छन् ।
डोटीकी सञ्चारकर्मी सरिता कठायतका अनुसार यो घटना समाजमा महिलामाथि पर्ने मानसिक र सामाजिक दबाबको डरलाग्दो चित्र हो । उनले भनिन्, “यो केवल व्यक्तिगत त्रासदी होइन, न्याय प्रणाली र सामाजिक सोच दुवैका लागि गम्भीर प्रश्न हो।”
