- जगत वाशिष्ठ
सुर्खेत। मध्यपश्चिम विश्वविद्यालयको पाँच वर्षे रणनीतिक योजना निर्माणका लागि विषयगत कार्यदलसँगको बैठक सुरु भएको छ।
योजना विकास तथा अनुगमन निर्देशनालयका कार्यकारी निर्देशक डा. विष्णुकुमार खड्काको नेतृत्वमा रणनीतिक योजना समिति र विभिन्न विषयगत उपसमितिले आजदेखि बैठकको शृङ्खला आरम्भ गरेका हुन्। समितिले योजना निर्माण कार्य समयसीमाभित्र सम्पन्न गर्ने लक्ष्य राखेको छ।
शुक्रबार सुर्खेतस्थित केन्द्रीय कार्यालयमा जनशक्ति व्यवस्थापन, नीति तथा योजना निर्माण कार्यदलसँग सघन छलफल गर्दै बैठक सम्पन्न भएकाे छ।
कार्यदलका संयोजक डा. रेशमबहादुर विष्टको समन्वयमा सुरु भएको छलफलमा कार्यकारी निर्देशक डा. खड्काले सबै विषयगत कार्यदलसँग चरणबद्ध बैठक गरी योजनालाई अन्तिम रूप दिने बताए।
बैठकमा कार्यदल संयोजक डा. विष्ट तथा सदस्यहरूले समावेशी टिम निर्माण गरेकोमा धन्यवाद व्यक्त गर्दै विभागीय कार्यदलले आफ्नो जिम्मेवारी पूरा गर्ने प्रतिबद्धता जनाए।
बैठकमा निर्देशनालयका प्रशासन प्रमुख शेरबहादुर केसीले आवश्यक सुझाव संकलन तथा टिपाेट गरेका थिए।
