सर्लाही, लालबन्दी। जनज्योति बहुमुखी क्याम्पस, सर्लाही लालबन्दीको २६ औँ वार्षिकोत्सव तथा क्याम्पस सभा सम्पन्न भएको छ । मङ्सिर ६ गते क्याम्पसमा आयोजित समारोहबीच वार्षिकोत्सव तथा सभा सम्पन्न भएको हो ।
कार्यक्रममा क्याम्पस सभा सदस्य, अक्षयकोष दाताहरू, स्थानीय शिक्षाप्रेमी, समाजसेवी, विभित्र पार्टीका प्रतिनिधिहरू, लालबन्दी उद्योग वाणिज्य संघका सभापति, क्याम्पसका प्राध्यापक, कर्मचारी तथा अध्ययनरत विद्यार्थीलगायतको सहभागिता रहेको थियो ।
क्याम्पस व्यवस्थापन समिति अध्यक्ष दीपक अधिकारीको अध्यक्षतामा सम्पन्न कार्यक्रममा मधेश प्रदेश सरकार श्रम तथा यातायात व्यवस्था मन्त्रालयकी पूर्वमन्त्री तथा सर्लाही जिल्ला क्षेत्र नं। १ ‘ख’ की प्रदेश सांसद मा। बेची लुङ्गेली प्रमुख अतिथि र लालबन्दी नगरपालिकाका मेयर वासुदेव अधिकारी विशिष्ट अतिथिका रुपमा उपस्थित थिए ।
कार्यक्रममा क्याम्पस प्रमुख विरेन्द्र चौधरीले वि।सं। २०५७ सालमा स्थापना भएको यस क्याम्पसले वि।सं। २०७९ मा विश्वविद्यालय अनुदान आयोगबाट गुणस्तर प्रत्यानकृत हुन सफल भएको बताए ।
कार्यक्रमका प्रमुख अतिथि सांसद लुङ्गेलीले सर्लाही जिल्लाको मात्रै नभएर मधेश प्रदेशमा नै यस क्याम्पसले सबैको विश्वास जितेको र यस क्याम्पसका धेरै विद्यार्थीहरूले लोकसेवामा नाम निकाली विशिष्ट स्थानमा पुगेर मुलुकको सेवा गरिरहेको बताइन ।
त्यसैगरी मेयर अधिकारीले स्थानीय क्षेत्रसँग सम्बधित अनुसन्धानमा क्याम्पसले भूमिका खेल्नुपर्ने विचार व्यक्त गरे ।
कार्यक्रमका विषयमा विचार प्रस्तुत गर्दै शिक्षाप्रेमी बलराम पोख्रेलले यस क्याम्पसले उत्कृष्ट विदेशी विश्वविद्यालयहरूसँग पनि सम्बन्ध प्रगाढ गराएर गरीखाने शिक्षा दिनुपर्ने कुरामा जोड दिए ।
कार्यक्रमका सभापति तथा व्यवस्थापन समितिका अध्यक्ष अधिकारीले यस क्याम्पसले आगामी दिनमा प्राविधिक धारका कार्यक्रम र विषय थप गर्नुका साथै शैक्षिक वातावरणलार्इ प्रभावकारी बनाउने प्रतिबद्धता व्यक्त गरे । क्याम्पसका उपप्राध्यापक बाबुराम दाहालले कार्यक्रम सञ्चालन गरेका थिए ।
सभामा क्याम्पसले प्रकाशन गरेको ‘जनज्योति जर्नल’ को तेस्रो अङ्क विमोचन गरिएको थियो । जर्नल विमोचनका क्रममा अनुसन्धान व्यवस्थापन एकाइ संयोजक तथा उपप्राध्यापक रमेश भट्टराईले विश्वव्यापी प्रतिस्पर्धा गर्ने जनशक्ति तयार पार्न अनुसन्धान अत्यावश्यक हुने बताउँदै जर्नल त्यस रुपमा आएको बताए । मधेश प्रदेशअन्तर्गत सामुदायिक क्याम्पसले यसरी विज्ञ समीक्षित डीओआई इन्डेक्सवाला जर्नललाई नेपजोलमा प्रकाशन गरेर स्थानीय ज्ञान, यहाँका सम्भावनासहितको प्राज्ञिक दक्षतालाई पनि विश्वव्यापीकृत तुल्याउने प्रयास गरिरहेको उनले बताए ।
सभाले क्याम्पसको प्राध्यापक कर्मचारी नियमावली, आव २०८२/०८३ को अनुमानित आयरव्यय विवरण र आव २०८१/०८२ को लेखा परीक्षण प्रतिवेदनलाई पनि अनुमोदन गरेको छ ।
