बैतडी । बैतडीको एक विद्यालयमा २२ वर्षीय युवा विद्यालयको प्रधानाध्यापकमा नियुक्त भएका छन् । देशमा जेनजीहरुको चर्चा चलिरहेका बेला बैतडीमा कलिलो उमेरमै एक युवाको यो सफलताको खबर आएको हो ।
बैतडीको पाटन नगरपालिका–८ स्थित जनप्रिय आधारभूत विद्यालयको प्रधानाध्यापकमा २२ वर्षीय भरत भण्डारी नियुक्त भएका हुन् । शिक्षण पेशामा आवद्ध भएको ६ महिनामै भण्डारीले प्रधानाध्यापकको जिम्मेवारी पाएका हुन्। विद्यालय व्यवस्थापन समितिले करार राहत कोटामा शिक्षक रहेका भण्डारीलाई प्रधानाध्यापकको जिम्मेवारी दिने निर्णय गरेको छ ।
पाटन नगरपालिका –९ घर भएका भण्डारी गएको वैशाख मात्रै शिक्षण पेशामा आवद्ध भएका थिए । भण्डारीले विद्यालयले सुम्पेको जिम्मेवारीलाई कुशलतापूर्वक निर्वाह गर्ने बताएका छन् । आफूले विद्यालयमा परिवर्तन ल्याउने चाहना राखेको र यो जिम्मेवारी पाएको उनले बताएका छन् । साथै उनले आफ्नो सपना पूरा गर्न सबैको साथ सहयोग आवश्यक रहेको बताएका छन् ।
प्रधानाध्यापकको जिम्मेवारी पाएपछि भण्डारीले विद्यालय परिवार, पदाधिकारी र अभिभावकप्रति आभार व्यक्त गर्दै आगामी दिनमा साथ, सहयोग र हौसलाको अपेक्षा गरेको बताएका छन् ।
