• जगत वशिष्ठ

पाल्पाकाे तानसेन नगरपालिका–१२ लुहुङस्थित श्री लुम्बिनी माध्यमिक विद्यालयले परीक्षा नतिजा प्रकाशनको अनौठो र पारदर्शी अभ्यास सुरु गरेको छ। विद्यालयले विद्यार्थीहरूको उत्तरपुस्तिका अभिभावकलाई देखाएर सल्लाह र सुझाव संकलन गरेकाे छ ।

विद्यालयले दोस्रो त्रैमासिक परीक्षाको नतिजा सार्वजनिक गर्दा अभिभावक भेला आयोजना गरेको थियो। भेलामा करिब ५०० जना अभिभावक सहभागी भए। साेही भेलामा उक्त जानकारी दिइएकाे थियाे ।

साे अवसरमा कार्यक्रमकी प्रमुख अतिथि तथा वडा सदस्य बसन्ती रानाले छोरीहरूलाई पनि शिक्षामा समान अवसर दिनुपर्ने बताइन्। उनले भनिन्, “अघिल्ला दिनमा छोरीहरू घरधन्दा र चुलोचौकामा सीमित थिए, तर आज उनीहरू राज्यका निकायमा समेत प्रतिनिधित्व गर्न थालेका छन्।”

उनले अभिभावकको सचेतता र विद्यालयको पारदर्शी प्रयासले बालबालिकाको भविष्य उज्यालो बनाउन सहयोग पुग्ने विश्वास व्यक्त गरिन ।

प्रधानाध्यापक दीपक गौतमले विद्यार्थीको प्रगतिमा शिक्षक र अभिभावक दुवैको बराबर भूमिका हुने बताए। उनले विद्यालयमा शिक्षकले मार्गदर्शन गर्ने र घरमा अभिभावकले पृष्ठपोषण गर्नुपर्नेमा जोड दिए ।

कार्यक्रममा बाल शिक्षादेखि कक्षा १२ सम्मका विद्यार्थीहरूको उत्तरपुस्तिका अभिभावकलाई देखाइएर उनीहरूको सुझाव र प्रतिक्रिया संकलन गरिएकाे थियो।

याे प्रणालीले विद्यार्थीलाई शिक्षकको निष्पक्ष मूल्यांकनबारे अभिभावकलाई प्रत्यक्ष प्रमाण देखाउने विद्यालयका एक शिक्षकले बताए । अभिभावकहरूले पनि आफ्ना बालबालिकाको लेखाइ र प्राप्ताङ्क बुझ्ने अवसर पाए।

अभिभावकका अनुसार, यस्तो प्रणालीले उनीहरूलाई बालबालिकाको अध्ययनमा बढी उत्तरदायी बनाउनेछ। विद्यालयले अभिभावकका सल्लाहलाई व्यवहारमा उतार्ने अाशा अभिभावकको रहेको छ।

कार्यक्रम शिक्षक–अभिभावक संघका अध्यक्ष ताराबहादुर रानाको अध्यक्षतामा सम्पन्न भएकाे थियो भने शिक्षक युवराज पौडेलले सञ्चालन गरेका थिए। कार्यक्रममा उत्कृष्ट विद्यार्थीहरूलाई पुरस्कार वितरण पनि गरिएकाे थियो।

पूर्वविद्यार्थी मञ्च गठन

यसैबीच केही दिनअघि विद्यालयमा पूर्वविद्यार्थी मञ्च गठन गरिएको छ। एक भेलाकाे अायाेजना गरि मञ्च गठन गरिएको हाे । भेलाबाट दलबहादुर रिसालको अध्यक्षतामा १५ सदस्यीय समिति र थानेश्वर गैरेको संयोजकत्वमा तीन सदस्यीय सल्लाहकार समिति गठन गरिएको हो। अध्यक्ष रिसालका अनुसार, समितिले विद्यालयको इतिहास र उपलब्धि समेटेर स्मारिका प्रकाशन गर्ने निर्णय गरेको छ।

पूर्व शिक्षक तथा अभिभावक यदुनाथ पौडेलले मञ्चले विद्यालयको शैक्षिक, भौतिक र आर्थिक क्षेत्रमा टेवा पुग्ने बताए। उनले भने, “म स्वयं यो विद्यालयको विद्यार्थी र शिक्षक दुवै भएको नाताले यसप्रति गहिरो माया राख्छु।”

विद्यालयले सुरु गरेको उत्तरपुस्तिका प्रदर्शन प्रणालीले पारदर्शिता बढाएको छ। विद्यार्थी, अभिभावक र शिक्षकबीचको सम्बन्ध अझ सुदृढ बनेको विद्यालयको विश्वास छ।