भोजपुर । छात्राको स्वास्थ्य र सुविधा ध्यानमा राखी भोजपुरका विद्यालयमा स्वचालित सेनेटरी प्याड वितरण मेसिन जडान गर्न थालिएको छ । भोजपुरको भोजपुरको रामप्रसाद राई गाउँपालिकाले यस्तो कार्य थालेको हो।
गाउँपालिकाले महिनावारीका बेला छात्राले सहज र आत्मविश्वासका साथ विद्यालय आउन सकून् भन्ने उद्देश्यले यो पहल गरिएको जनाएको छ।
गाउँपालिका अध्यक्ष थामबहादुर राईले हालसम्म पालिकाभित्रका १२ सामुदायिक विद्यालयमध्ये ९ विद्यालयमा मेसिन जडान भइसकेको जानकारी दिए । बाँकी विद्यालयमा पनि चाँडै मेसिन जडान गरिने उनको भनाइ छ।
अध्यक्ष राईका अनुसार, पहिले गाउँपालिकाले विद्यालयमा प्याड पठाउने गर्थ्यो। तर धेरै छात्रा लाजका कारण माग्न हिच्किचाउँथिन्। अब मेसिनमार्फत उनीहरूले गोप्य रूपमा सहजै लिन सक्नेछन्।
पहिलो चरणमा सात माध्यमिक र पाँच आधारभूत विद्यालयमा मेसिन जडान गर्ने योजना रहेको गाउँपालिकाले जनाएको छ। कार्ड प्रणाली प्रयोग गरेर छात्राले आवश्यक प्याड विद्यालयमै लिन सक्नेछन्।
शिक्षा शाखाले यो पहलले महिनावारीका कारण घट्ने छात्राको उपस्थितिमा सुधार ल्याउने विश्वास व्यक्त गरेको छ।
गाउँपालिकाले आगामी चरणमा सबै विद्यालयमा मेसिन जडान गर्ने र सचेतना कार्यक्रम पनि सञ्चालन गर्ने तयारी गरेको छ।
