भक्तपुर । भक्तपुरमा पहिलो पटक आयोजना गरिएको अन्तर–विद्यालय नाटक प्रतियोगिता सम्पन्न भएको छ। नेसनल प्याव्सन भक्तपुरअन्तर्गत मदरल्याण्ड स्कुलले आयोजना गरेको प्रतियोगितामा विभिन्न विद्यालयको सहभागिता रहेको थियो।
प्रतियोगितामा ऋतम्भरा पाठशाला प्रथम बन्यो। ईडेन गार्डेन दोस्रो र संस्कार गुरूकूल तेस्रो स्थानमा चयन भए। त्यसैगरी, विमल मेमोरियल विद्यापीठले सान्त्वना स्थान प्राप्त गर्यो।
व्यक्तिगत तर्फ आरक्षण नेसनल स्कुलकी यूनिशा खत्री ‘उत्कृष्ट कलाकार’ घोषित भइन्। अन्य विभूषणमा पाथिभरा एकेडेमीले उत्कृष्ट प्रस्तुति, क्वालिटी स्कुलले उत्कृष्ट निर्देशन, यूनिटी स्कुलले उत्कृष्ट सन्देश, जागृति विद्या सदनले उत्कृष्ट मञ्च व्यवस्थापन र संस्कार गुरूकूलले उत्कृष्ट कथा अवार्ड हात पार्यो।
कार्यक्रमका प्रमुख अतिथि तथा मुख्य निर्णायक वरिष्ठ रङ्गकर्मी केदार श्रेष्ठले विद्यालय स्तरमै नाटक प्रतियोगिता आयोजना हुनु सकारात्मक पहल भएको टिप्पणी गरे। उनले यसले विद्यार्थीको प्रतिभा पहिचानमा मद्दत गर्ने बताए।
नेसनल प्याव्सन भक्तपुरका अध्यक्ष संजय खड्काले नाटक विद्यार्थीको व्यक्तित्व विकासमा प्रभावकारी माध्यम हुने उल्लेख गरे।
मदरल्याण्ड स्कुलकी सञ्चालक शर्मिला देउजाको अध्यक्षतामा सम्पन्न कार्यक्रममा अभिनेत्री तथा नाटक प्रशिक्षक आरती गौतम र थिएटर कलाकार एडेन बात्री निर्णायकका रुपमा सहभागी थिए।
प्रतियोगितामा नेसनल प्याव्सन भक्तपुरका पदाधिकारी, सल्लाहकार तथा विभिन्न विद्यालयका प्रिन्सिपलको उपस्थिति रहेको आयोजकले जनाएको छ।
