काठमाडौं । त्रिभुवन विश्वविद्यालयमा दीक्षान्त समाराेहमा भाग लिने विद्यार्थीकाे संख्या निरन्तर घट्दै गएकाे छ । आगामी पुस १० गते हुने विश्वविद्यालयको ५१औँ दीक्षान्त समारोहमा सहभागि हुन अत्यन्तै न्यून संख्याले आवेदन दिएका छन् ।
यस वर्ष त्रिविमा ७९ हजार १ सय ९१ विद्यार्थी दीक्षित हुने योग्य रहेका थिए । तर, दीक्षान्तमा सहभागी हुन केवल १७ हजारले मात्र आवेदन दिएका छन्। विश्वविद्यालयका अधिकारीहरूले कूल योग्य विद्यार्थीको झन्डै १९ प्रतिशतले मात्र सहभागितामा रुचि देखाएको जानकारी दिएका छन्।
अघिल्लो वर्ष पनि स्थिति खासै उत्साहजनक थिएन। गत वर्ष करिब ७२ हजार योग्य विद्यार्थीमध्ये १४ हजारले मात्र आवेदन दिएका थिए। उपकुलपति प्रा. डा. दीपक अर्यालका अनुसार आफूले पदभार सम्हालेपछि विश्वविद्यालयको वातावरण सुधारमा निरन्तर प्रयास भए पनि दीक्षान्तमा विद्यार्थीको रुचि अपेक्षाकृत कमजोर देखिएको बताएका छन्।
आगामी महिनामा हुने समारोहका लागि ग्रेसलिस्ट त्रिवि सभाबाट पारित भइसकेको छ। सबै परीक्षा उत्तीर्ण गरी दीक्षित हुने योग्य भएका विद्यार्थीले शैक्षिक प्रमाणपत्र औपचारिक रुपमा ग्रहण गर्ने अवसर भए पनि त्यसप्रति आकर्षण कम रहेको उपकुलपति अर्यालको भनाइ छ।
उनका अनुसार यस वर्षको दीक्षान्तलाई विशेष बनाउन विश्वविद्यालयले जापानको टोकियो विश्वविद्यालयका नोबेल पुरस्कार विजेता वैज्ञानिकलाई दीक्षान्त वक्ताको रूपमा निमन्त्रण गरिएको छ।
“यो त्रिविको इतिहासमै महत्वपूर्ण उपलब्धि हो,” उपकुलपति अर्यालले भने, “तर योग्य विद्यार्थीमध्ये केवल १९ प्रतिशतले मात्र सहभागिता जनाउनु भने सकारात्मक सन्देश होइन।”
दीक्षान्त समारोह विश्वभरका विश्वविद्यालयमा विद्यार्थी र अभिभावक दुवैको भावनात्मक सहभागितासँग जोडिने गर्दछ । उपकुलपति अर्याल नेपालमा दीक्षान्तप्रतिको महत्व नबुझिनु तथा विश्वविद्यालयले यसको प्रभावकारी प्रचार–प्रसार गर्न नसक्नुका कारण विद्यार्थीकाे सहभागिता दर घट्दै गएकाे बताउँछन् ।
