काठमाडौ । त्रिभुवन विश्वविद्यालयका नव–नियुक्त उपप्राध्यापकहरूको सेवा प्रवेश तालिम कार्यक्रम सुरु भएको छ।
त्रिभुवन विश्वविद्यालयका उपकुलपति प्रा. डा. दिपक अर्यालले पानसमा दीप प्रज्वलन गरी तालिम कार्यक्रमको उद्घाटन गरेका छन् ।
तालिमको उद्घाटन गर्दै उपकूलपति अर्यालले त्रिविका नीति नियम र शैक्षिक क्यालेन्डरमा ध्यान दिई समयानुकूलको व्यवसायिक पाठ्यक्रम सुधारमा लाग्न सबैलाई आग्रह गरे । उनले तालिमले सदाचार र अुशासनमा रहन उत्प्रेरित गर्ने बताउउँदै यो तालिमलाई अन्तरक्रियात्मक बनाउनुपर्नेमा जोड दिए ।
कार्यक्रमका प्रमुख अतिथि समेत रहेका उपकुलपति अर्यालले भने, शिक्षक प्राध्यापकहरू राष्ट्र निर्माणका आधारस्तम्भ हुन, विश्वविद्यालयको शैक्षिक गुणस्तर शिक्षकको सीप, इमान्दारिता र प्रतिबद्धताबाट मूल्याङ्कन हुन्छ। यस तालिमले नयाँ उपप्राध्यापकहरूलाई शिक्षण, अनुसन्धान र सेवा क्षेत्रमा थप सक्षम बनाउनेछ ।”
साथै उनले त्रिविले समयानुकूल पाठ्यक्रम विकास, अनुसन्धान प्रवर्द्धन र प्रविधिमैत्री शिक्षण प्रणालीलाई प्राथमिकतामा राख्दै अघि बढिरहेको जानकारी दिए ।
कार्यक्रममा रजिस्ट्रार ले त्रिविको सेवा नियमावली, आचारसंहिता र प्रशासनिक संरचनाबारे सहभागीहरूलाई जानकारी गराउँदै शिक्षक केवल विषयवस्तु पढाउने व्यक्ति मात्रै नभई विद्यार्थीको मार्गदर्शक र समाज रूपान्तरणका संवाहक पनि भएको बताए । त्यसैले शिक्षक प्राध्यापकको पेसागत विकासका लागि यस्ता तालिम अत्यावश्यक रहेको उनको भनाई थियो । सहभागीहरुले अनुशासित भई तालिमबाट राम्रो कुरा सिक्न र त्यसका आधारमा विद्यार्थीलाई सिकाउन पनि उनले जोड दिए ।
कार्यक्रम सञ्चालक समेत रहेका दिपक तिवारीले तालिमको उद्देश्य, कार्यविधि, तालिका, त्रिविको प्रशासनिक संरचना र सेवा प्रवाहबारे प्रकाश पार्दै सक्रिय सहभागिताका लागि सबैलाई आह्वान गरेका थिए ।
तालिममा त्रिविका पूर्व रजिस्ट्रार तथा हालका बागमती प्रदेश विश्वविद्यालयका अध्यक्ष प्रा. डा. चन्द्रमणि पौडेल, त्रिवि विज्ञान तथा प्रविधि अध्ययन संस्थानका पूर्व डिन प्रा. डा. विनिल अर्याल आदि विज्ञको रुपमा उउपस्थिति रहेका थिए । तालिममा त्रिविका विभिन्न क्याम्पस र सङ्कायबाट छनोट भएका १०० जना उपप्राध्यापकहरूको सहभागिता रहेको छ ।
सेवा प्रवेश तालिममार्फत नयाँ उपप्राध्यापकहरूलाई त्रिविको शैक्षिक मूल्य–मान्यता, नीति–नियम, पेसागत आचरण र अध्ययन–अध्यापनका आधुनिक विधिहरूबारे व्यवहारिक ज्ञान प्रदान गरिने समन्वय महाशाखा प्रमुख दिपक तिवारीले जनाए ।
