काठमाडौं । चिकित्सा शिक्षा आयोगको आइतबार बसेको बैठकमा अनौठो दृष्य देखियो । आयोगको अध्यक्षसमेत रहेका प्रधानमन्त्रीदेखि मन्त्रीहरु ट्वाल्ल पर्ने गरी बैठकका एजेण्डा प्रस्तुत भइ निर्णय सुनाउन थाल्यो । मन्त्रीहरु प्रधानमन्त्रीको अनुहार हेर्न थाले अनि एकअर्कामा हेर्दै आश्चर्य चकित भए । बैठकमा सदस्य सचिवले कसैलाई थाहा नै नभएको एजेण्डामाथि निर्णय भइसकेको भनेर निर्णय सुनाउन थाले । निर्णय सुनाएर सक्दा नसक्दै शिक्षा सचिवले सबैलाई ताली पडकाउन भने । मन्त्रीहरु एकछिन ट्वाल्ल परेर हेरिरहे ।
जेनजी आन्दोलनको बलमा बनेको वर्तमान सरकार यसरी नै दिनहुँ आश्चर्यचकित पर्ने स्थिति बन्दै गएको छ । सरकारका प्रधानमन्त्री र मन्त्रीहरुलाई थाहा नै नदिइ कर्मचारी संयन्त्रले सुटुक्क विभिन्न निर्णय गर्दै जान थालेपछि सरकार बडा अप्ठ्यारोमा परेको बताइन्छ ।
यसै क्रममा आइतबार चिकित्सा शिक्षा आयोगको बैठकमा प्रधानमन्त्री सुशिला कार्कीले आफूलाई कुनै जानकारी नै नदिई, एजेण्डाबारे ब्रिफिङ नगरी निर्णय सुनाइएपछि ‘कुहिराको काग’ भएको प्रतिक्रिया दिईन । उनले भनिन्, “यो कस्तो के भएको हो । म त कुहिरोको काग पो भए । बैठकको निर्णय कसरी भयो ? बैठकभन्दा एकदिन अघि नै एजेण्डाबारे ब्रिफिङ गरेको भए थाहा हुन्थ्यो । नजानेको विषयमा हात नहालेको राम्रो ।”
आइतबार चिकित्सा शिक्षा आयोगको बैठक सिंहदरवारस्थित प्रधानमन्त्री तथा मन्त्रिपरिषद्को कार्यालयमै बसेको थियो । बैठकमा आयोगको अध्यक्ष समेत रहेकी प्रधानमन्त्री सुशिला कार्की, शिक्षा, विज्ञान तथा प्रविधिमन्त्री महावीर पुन, स्वास्थ्यमन्त्री डा. सुधा शर्मासहित आयोगका पदाधिकारीहरु, सचिवहरू, निजी मेडिकल कलेज सञ्चालकहरू सहभागी भएका थिए।
जब बैठक सुरु भयो, बैठकमा निर्णय सुनाउन थालियो । बैठकको सुरुमै आयोगका सदस्य सचिव वसन्तप्रसाद कोइराला निर्णय सुनाउन लागे । अनौठो त यो भयो कि बैठकको प्रक्रियामा यसअघि एजेण्डा प्रस्तुत गरिन्थ्यो, त्यसमाथि बैठकमा सहभागीहरुबाट धारणा लगिन्थ्यो । त्यसपछि निर्णय गरेर अन्तिममा निर्णय सुनाइन्थ्यो । बैठकमा गरिएको निर्णयलाई आयोगका अध्यक्ष अावश्यक पर्ने सराेकारवालासँगको थप परामर्शमा सदस्य सचिवले माइन्यूटमा निर्णय राम्ररी लेख्ने र त्यसको जानकारी सबैलाई पठाउने गरिन्थ्यो । तर, आइतबार भने बैठकमा एजेन्डा पनि सुनाइएन । सिधै निर्णय सुनाइयो । सदस्य सचिव कोइरालाले चिकित्सा शिक्षाको स्नातकोत्तर तहमा सिट निर्धारण भइसकेको जानकारी दिए । उनको निर्णय भुईमा खस्न नपाउँदै शिक्षा मन्त्रालयका सचिव चुडामणि पौडेलले निर्णयमाथि स्वीकृति जनाउँदै सबैलाई ताली बजाउन भने ।
एकछिन वातावरण सुनसान भयो । मन्त्रीहरु मुखामुख गर्न थाले । मन्त्रीहरुलाई निर्णय के भएको हो र के मा ताली पडकाउने हो भन्ने केही थाहा भएन । प्रधानमन्त्री पनि बिलखबन्दमा परेर हेर्न थालिन । त्यहीबीचमा बल्ल स्वास्थ्यमन्त्री डा. सुधा शर्माले मुख खोलिन । अलि रिसाएको शैलीमा प्रस्तुत हुँदै उनले बाेलिन् “बैठकको एजेण्डा किन नदिइएको हो ? के मा ताली पडकाउने हो ? म ताली बजाउन सक्दिनँ । गृहकार्य गरेर मात्र आयोगको बैठक आयोजना गर्नुपर्ने होइन । तयारी नै नगरी, के विषयमा बैठक राखेको हो ? जानकारी दिनुपर्ने होइन ? कसरी ताली बजाउन सकिन्छ ?”
स्वास्थ्यमन्त्रीले मन्त्रीहरुका तर्फबाट मौनता तोडेपछि शिक्षामन्त्री महावीर पुनको पालो आयो । उनले स्वास्थ्यमन्त्रीलाई साथ दिँदै बैठकको शैलीमाथि प्रश्न उठाए । उनले भने, ‘कुरा के हो ? मेरो हातमा एउटा मात्र पेपर आएको छ । त्यो के कागज हो ? विषय त जानकारी त गराउनु पर्छ नि । बैठक राख्दा एजेन्डा बिफ्रिङ गर्नुपर्दैन ? यहाँ कुन कलेजलाई कति सिट निर्धारण गर्नुभएको हो ? कसरी गर्नुभएको हो ? सिट निधारण पारदर्शी हुनुपर्छ । पहिले पहिल् सरकारीलाई कम र निजीलाई बढी सिट निर्धारण हुने गरेको सुनेको हो । अब पनि त्यस्तो गर्न सकिन्न ।”
दुई मन्त्री रिसाएर पडकिन थालेपछि बल्ल प्रधानमन्त्रीले मुख खोलिन । बैठकको अध्यक्षता गरिरहेकी प्रधानमन्त्री कार्कीले ‘आफू कुहिरोको काग’ जस्तो भएको बताइन्। उनले बैठकको एजेन्डा र प्राथमिकता नै नबुझाइएको भन्दै अन्यौलता जनाइन ।
