- जगत वाशिष्ठ
काठमाडौँ । नेपालको नारी शिक्षामा योगदान पुर्याउँदै आएको पद्मकन्या बहुमुखी क्याम्पसको ७५ औं हिरक जयन्ती सम्पन्न भएको छ । महिला सशक्तिकरणका लागि गुणस्तरिय शिक्षा भन्ने नाराका साथ पीके क्याम्सले हिरक जयन्ती सम्पन्न गरेको हो ।
२००८ साल असोज १ गते स्थापना भएको क्याम्पसको स्थापना दिवस तथा हिरक जयन्तीका अवसरमा आयोजित कार्यक्रममा राष्ट्रपति रामचन्द्र पौडेलले विशेष सम्बोधन गरेका थिए । राष्ट्रपति पौडेलले देशको शैक्षिक गुणस्तर विकासका लागि पद्मकन्या क्याम्पसले खेलेको भूमिकाको स्मरण गर्दै क्याम्पसको उन्नती समग्र देशको उन्नती हुने बताए ।
सो क्रममा राष्ट्रपति पौडेलले पद्मकन्या क्याम्पस साढे सात दशकको गौरवपूर्ण इतिहास भएको नेपालको अग्रणी शैक्षिक संस्था भएको बताए। नारी शिक्षाका लागि मुलुककै प्रमुख प्राज्ञिक केन्द्र बन्न सफल भएकोमा सबैलाइ बधाइ दिँदै राष्ट्रपति पौडेलले नारीहरूको शैक्षिक उन्नयनमा पिकेको योगदान सबैलाइ थाहा भएको र नेपाली नारीका लागि उच्च शिक्षाको ढोका पिकेले खोलेको र यो नारी शिक्षाको प्रर्यायका रूपमा रहेको बताए । उनले क्याम्पसलाइ महिला विश्वविद्यालयका रूपमा स्तरोन्नतिका गर्न पहल भइरहेको उल्लेख गर्रदै यसले आफूलाइ खुसी तुल्याएको बताए । उनले लोकतन्त्र र मुलुकलाइ जोगाउन आगामी फागुन २१ गते प्रतिनिधि सभाको निर्वाचन तोकिएको र त्यसले देशको सुशासन विकास र समृद्धिको यात्रालाइ सुदृढ तुल्याउँदै नयाँ दिशा दिने विश्वास व्यक्त गरे । साथै उनले फागुन २१ मा हुने निर्वाचन सफल पार्न सबैलाइ आग्रह गरे ।
हिरक जयन्तीका अवसरमा क्याम्पसमा विभिन्न कार्यक्रमहरु गरिएका थिए । क्याम्पसमा लामो समय सेवा गरेका प्राध्यापक तथा कर्मचारीहरुलाई सम्मान तथा पुरस्कृत पनि गरिएको थियो। साे अवसरमा क्याम्पसमा कार्यरत प्रशासनिक कर्मचारी, प्राध्यापक, पूर्व प्राध्यापक, अभिभावक, क्याम्पसमा अध्ययनरत विद्यार्थी, पूर्व विद्यार्थीहरूको उपस्थिति रहेको थियो ।
